ဘရာဇီးလ်နိုင်ငံတွင် မြေသုံးစွဲမှုလျှော့နည်းသက်သာစေသော စိုက်ပျိုးရေးနည်းပညာ ကို အသုံးပြုခဲ့သဖြင့် ပဲပုတ်စေ့စိုက်ပျိုးမြေဟက်တာ ၇၁ သန်းကျော်အထိ လျှော့ချစိုက်ပျိုးနိုင်ခဲ့ ကြောင်း Brazilian Agricultural Research Company(Embrapa)၏ လေ့လာတွေ့ရှိချက်အား သတင်းတွင် ဖော်ပြခဲ့သည်။ ဆန်းသစ်သောစိုက်ပျိုးရေးနည်းစနစ်ကြောင့် ကျေးငှက်တိရိစ္ဆာန် များရှင်သန်နေထိုင်သည့် မြေရိုင်းဟက်တာ ၁.၅၅ သန်းအား စိုက်ပျိုးမြေအဖြစ် ခုတ်ထွင်ပြုပြင် အသုံးပြုခြင်းမှ အကာအကွယ်ပေးနိုင်ခဲ့ပြီး ဝက်မွေးမြူရေးလုပ်ငန်းများတွင်လည်း မြေဟက်တာ ၁ သန်းအား လျှော့ချနိုင်ခဲ့ကြောင်း ၎င်းသုတေသနကုမ္ပဏီက သတင်းဌာနသို့ပြောကြားခဲ့သည်။

မြေသုံးစွဲမှုလျှော့ချရေးနည်းပညာသည် လက်ရှိမြေဧရိယာတွင် ပိုမိုတိုးတက်ထုတ်လုပ် နိုင်စေရန် ပေါင်းစည်းကုန်ထုတ်လုပ်မှုစနစ်ကို အသုံးပြုသည့်နည်းစနစ်ဖြစ်ပြီး စိုက်ပျိုးရေးနှင့် မွေးမြူရေးလုပ်ငန်းများ တိုးချဲ့လုပ်ကိုင်ရန်အတွက် သစ်တောများခုတ်ထွင်ရှင်းလင်းခြင်းကို ရှောင်ရှားနိုင်မည်ဖြစ်သည်။ အဆိုပါနည်းပညာသစ်သည် စိုက်ပျိုးရေး၊ မွေးမြူရေးနှင့် သစ်တော များပုံမှန် ရှင်သန်ပေါက်ရောက်မှုအား ပေါင်းစည်းထားသည့်စနစ်(integrated crop-livestock-forest system – ILPF)ဖြစ်ပြီး စိုက်ပျိုးရေးအတွက်ထွန်ယက်ခြင်းနှင့် ဓာတ်မြေဩဇာသုံးစွဲရ ခြင်းတို့ကို ဆောင်ရွက် ရန်မလိုအပ်ဘဲ သဘာဝဇီဝမြေဩဇာများကိုအသုံးပြု၍ စိုက်ပျိုးနိုင်မည် ဖြစ်သည်။

ဘရာဇီးလ်နိုင်ငံတွင် မြေသုံးစွဲမှုလျှော့ချရေးနည်းစနစ်ကဲ့သို့သော ရေရှည်ဖွံ့ဖြိုးတိုး တက် စေမည့်စနစ်များနှင့် နည်းပညာများ အဆင်သင့်ရှိနေကြောင်း၊ ထို့ကြောင့် ဘရာဇီးလ်နိုင်ငံ ၏ အဓိကစိုက်ပျိုးထုတ်လုပ်သည့်လုပ်ငန်းများတွင် အဆိုပါနည်းစနစ်များကို မဟာဗျူဟာချမှတ် ကျင့်သုံးဆောင်ရွက်ရန် စဉ်စားသင့်ကြောင်း Embrapa ကုမ္ပဏီမှ စိုက်ပျိုးရေးပညာရှင် Samuel Roof က သတင်းဌာနသို့ ပြောကြားခဲ့သည်။

မြေသုံးစွဲမှုလျှော့ချရေးနည်စနစ်သည် စိုက်ပျိုးရေးနှင့်မွေးမြူရေးလုပ်ငန်းများ လုပ်ကိုင် နေကြသည့် အသေးစား၊ အလတ်စားနှင့် အကြီးစားလုပ်ငန်းအရွယ်အစားအားလုံးကို အကျိုး ဖြစ်ထွန်းစေသဖြင့် အလေးထားလုပ်ဆောင်သင့်သည့်နည်းစနစ်ဖြစ်ကြောင်း Embrapa ကုမ္ပဏီ ၏ သုတေသနနှင့်ဖွံ့ဖြိုးမှုဌာန ညွှန်ကြားရေးမှူးက သတင်းဌာနသို့ ပြောကြားခဲ့သည်။

ယခင်က စိုက်ပျိုးမြေဟက်တာ ၃၆.၉ သန်းမှ ပဲပုတ်စေ့တန်ချိန် ၁၂၀.၉ သန်းသာ ထွက်ရှိခဲ့သော်လည်း မြေသုံးစွဲမှုလျှော့ချရေးနည်းစနစ်ကို အသုံးပြုစိုက်ပျိုးခဲ့ရာ ၂၀၁၉-၂၀၂၀ ခုနှစ်ကာလ ရိတ်သိမ်းချိန်တွင် စိုက်ပျိုးမြေဟက်တာ ၆၅.၈ သန်းမှ ပဲပုတ်စေ့တန်ချိန် ၂၅၁ သန်း ထွက်ရှိခဲ့ကြောင်း၊ လတ်တလောကာလတွင် နည်းစနစ်သစ်ဖြင့်စိုက်ပျိုးထွက်ရှိသည့် ပဲပုတ်စေ့ ပမာဏကို  ၁၉၇၀ နှစ်များတွင် စိုက်ပျိုးထုတ်လုပ်မည်ဆိုပါက လက်ရှိပဲပုတ်စေ့ စိုက်ပျိုးမြေ ဧရိယာ၏ ၃ ဆခန့် အထိ စိုက်ပျိုးရမည်ဖြစ်ကြောင်း ၄င်းညွှန်ကြားရေးမှူးက သတင်းဌာနသို့ ပြောကြားခဲ့သည်။

သတင်းရင်းမြစ် – canalrural.com.br

ထွန်းအောင်ဇော်၊ စီးပွာရေးသံမှူး

ဘရာဇီးလ်နိုင်ငံ